Incidiu no “limitadísimo” prazo para presentar os proxectos.
Tamén manifestou a súa preocupación pola posible desaparición da farola.
Luis López Bueno, líder do PSOE da Estrada, manifestou a súa preocupación polo proxecto de reforma da Farola. Un dos elementos que lle preocupa é que se poida rematar retirando a farola que lle dá nome, de xeito popular e non oficial, ao lugar e que é “un dos pouquísimos elementos emblemáticos que nos quedan na Estrada”.
Segundo o socialista, o PP “é unha máquina de eliminar elementos que forxaron a identidade da Estrada como vila”, como “a fonte na praza do Concello e a reforma da alameda, que acabou coa fonte, coa pérgola e cun entorno axardinado para convertelo nun mar de cemento cun pequeno charco que sempre está cheo de follas e suciedade”.
Tamén considera que “se deben respectar os elementos quenos identificaron historicamente como vila, non deben responder á ansia de obras faraónicas e mausoleos do alcalde”, e remítese á proposta que realizaron os socialistas durante a campaña electoral.
As sospeitas do PSOE
López Bueno manifestou o seu “pánico absoluto” polo xurado. Lembrou que no proxecto da Praza da Feira participaron o alcalde e o concelleiro de urbanismo, que “ata onde eu sei non son arquitectos, nin deseñadores, nin expertos en mobilidade ou construción nin nada que se lle pareza”.
O líder dos socialistas cre que no xurado “han primar os criterios políticos por riba dos técnicos”, polo que espera que conserven a farola e “non acaben co pouco patrimonio que nos queda”.
Amais, incidiu no “limitadísimo” prazo que teñen as empresas para presentar os seus proxectos (15 días que rematan o 29 de novembro, moito menos comparado cos 8 meses do proxecto da Praza da Feira), e non o ve razoable cando teñen que “resolver a mobilidade en vehículos, establecer zonas de carga e descarga, e facer un deseño da nova praza”.
“Non quero ser mal pensado, pero habemos ver quen se presenta e que proposta escolle ese xurado”
Luis López Bueno, líder do PSOE da Estrada
López Bueno considera “moi sospeitoso” que o prazo sexa “tan exiguo” e comentou que “habemos ver quen se presenta e que proposta escolle ese xurado”.
Para o socialista, nos últimos días estánse sucedendo unhas “estranas casualidades”, como que “na primeira edición do Premio Reimóndez Portela de Xornalismo que organiza o Concello casualmente se premie a un arquitecto que escribiu sobre as bondades dunha praza de terra que houbo que reformar despois de rematala”.
Imaxe de portada:
Imaxe de arquivo da Farola // PHDnoticias – O Xornal da Estrada
Xornal da Estrada 
Deixar un comentario