Reices asegura que as multas de Augas de Galicia son “un problema de preguiza do goberno local”

O Concello da Estrada recibiu unha nova sanción de Augas de Galicia por vertidos ao río. O total da multa asecendeu a 3200 euros, aínda que, como lembrou Xoán Reices, nalgunha ocasión chegou a ser de 7500 euros. O voceiro do BNG lamentou que este ano xa se pagasen 15.000 euros por sancións e asegurou que “non só é un problema medioambiental nin económico, é un problema de preguiza do goberno local. Non se fai ningún tipo de mantemento das arquetas e sumidoiros e despois xa se pagarán as multas, unha política que nos sae cara”.

Lembrou que a principios de setembro produciuse outra vertedura, afectando á praia fluvial. Pese a que solicitaron no pleno as análises, afirmou, aínda non as recibiron: “é unha estratexia habitual do alcalde cando pedimos información delicada, non responder e deixar pasar o tempo. Pero nós non nos esquecemos”.