Gonzalo Louzao trasladouse este xoves ata as dependencias da Deputación de Pontevedra para abordar coa nova responsable de Infraestruturas, Belén Cachafeiro, as obras que ten previsto realizar o organismo provincial no concello. Concretamente, falaron da humanización de Pérez Viondi, da variante da Estrada a Vinseiro e da senda peonil desde o Alto da Cruz ata Matalobos.
Sobre a humanización do tramo da rúa Pérez Viondi que pertence á Deputación lembraron que se trata dun treito de 300 metros comprendido entre o cruce coa Estrada de Ouzande e o cruce coa Avenida Benito Vigo. Aínda que se asfaltou recentemente, as obras pasarían pola ampliación do tramo destinado ao tránsito peonil, zona moi empregada na entrada e saída dos alumnos do CEIP Pérez Viondi. Ademais, colocaríase mobiliario urbano, zonas verdes e instalaríanse novas luminarias.
Aproveitaríase para actuar na praza situada diante do centro educativo, retirando a zona destinada ao aparcamento e cubríndoa para que os rapaces e rapazas poidan agardar os días de chuvia.
Sobre a EP-7016, a Estrada de Vinseiro, comentaron que o ancho da vía no seu tramo inicial é estreito e con curvas pronunciadas. O proxecto da variante permitiría conectala coa N-640 á altura da rotonda das Colonias cun trazado lineal de 7 metros de ancho fronte aos 4,5 actuais. “Este é un tema prioritario porque é unha cuestión de seguridade. Poder saír con visibilidade cara rotonda é clave para que esta conexión sexa segura”, sinalou o alcalde estradense. O Concello será quen teña que asumir as expropiacións.
Por último, trataron os avances na construción dunha senda peonil na EP-7004 entre o Alto da Cruz e a igrexa de Matalobos. Terá unha lonxitude de 2,5 quilómetros e faráse na marxe dereita. Na marxe esquerda faráse un formigonado con recollida de pluviais diante das casas.
Imaxe de portada: reunión de Louzao con Cachafeiro // cedida
Xornal da Estrada 
Deixar un comentario