Reices responde ao PP: “como burócratas son bos, pero como políticos son nefastos”

Xoán Reices, voceiro do BNG da Estrada, respondeu ás críticas feitas polo PP ao partido nacionalista na última semana.

Comezando pola resposta de Manuel Magariños, edil de Novas Tecnoloxías, sobre o cableado de telefonía caído, Reices asegurou que a resposta dada “confirma o que xa sabiamos, e saben os veciños e veciñas, é dicir, que todo está feito un desastre” mentras o goberno se escuda en ter tramitado a incidencia, “o que demostra que como burócratas son bos, pero como políticos son nefastos e aos feitos nos remitimos, xa que a día de hoxe os cables de fibra de Vera e Fontenlo seguen polo chan como hai meses”, comentou.

Engadiu que, de non ser polos traballadores que tramitan as cuestións burocráticas, “a situación do concello sería moito peor”. O nacionalista afirmou que “botar balóns fóra tamén o saben facer moi ben no goberno do PP”, á vez que “son os primeiros en poñerse na foto, cousa que ao alcalde dáselle moi ben tamén”.

“Os veciños e veciñas queren un goberno que lle solucione os problemas, non que sexa o campión das desculpas”

Xoán Reices, voceiro do BNG da Estrada

Ademais, aproveitou para responder ao alcalde Gonzalo Louzao sobre a variante da N-640. Confirmou que “é certo que non nos podemos colgar medallas sobre estas infraestruturas que levamos anos demandando, mais as críticas do alcalde demostran que, a pesar de que o BNG non ten o poder, si ten capacidade de influencia no goberno do Estado, colocando a variante no acordo de investidura, cousa que o PP, a pesar dos seus 13 deputados e deputadas elixidos polas circunscricións galegas non foron quen, nin agora nin nunca”.

Lembrou que os nacionalistas tamén conseguiron descontos na AG-53 e na AP-9 e prometeu no nome do seu partido que “até onde poidamos para que a Estrada teña Variante, cousa que xa é máis do que fará este alcalde”.

Imaxe de portada: cableado caído en Vera, Santo André de Vea // cedida