Os veciños dun edificio da Rúa Pozo do Barro (a antiga 2ª Travesía de Fernando Conde) denuncian que no baixo do edificio existe un almacén de madeira que, segundo comentan, incumpriría a lei.
O presidente da comunidade de veciños, Santiago Otero, comentou a este medio que o inicio do problema remóntase ao 2003 ou 2004 e que, en 2011, fixeron a primeira reclamación ante o Concello da Estrada. Esta non obtivo resposta.
En 2023 volveron reclamar e falaron con Gonzalo Louzao, naquel momento edil de Urbanismo. Otero comenta que Louzao redactou un texto dicindo que era ilegal, pero que non pasou nada máis.
Ante a falta de respostas e de medidas, decidiron acudir a un avogado para presentar un escrito no Concello e, pasados 2 ou 3 meses, aínda non recibiron resposta algunha. “Que significa? Porque non é normal que non contesten”, asegura Santiago Otero.
Debido a isto, optaron por informar á Valedora do Pobo desta situación e recibiron como resposta que van solicitar información sobre o caso. E é que o almacén podería non ter as medidas de seguridade que se requiren para ese uso, como poderían ser detectores de fume e de temperatura ou extintores, apunta Otero.
Ademais, engade, chegóuselle a plantexar ao propietario a opción de que a comunidade comprase o baixo, pero o prezo faríaselles “inviable”, tendo en conta que custaría “unha barbaridade” e que habería que acondicionalo para convertelo nun garaxe.
Imaxe de portada: Rúa Pozo do Barro // Xornal da Estrada
Xornal da Estrada 
Deixar un comentario