O acceso ás piscinas será gratuíto toda a tempada
Este venres entrará en funcionamento o vaso grande das piscinas municipais, despois da reforma á que foron sometidas. Á súa vez, o Concello anunciou que o acceso ao recinto será gratuíto ata o remate da tempada, o 15 de setembro. Esta medida xa se implementara no inicio da tempada, o pasado 1 de xullo, como medida temporal ata a apertura completa do espazo.
Este martes comezouse a encher o vaso grande e na tarde deste mércores a auga xa cubría todo o espazo, polo que se podería ter reaberto este xoves, aínda que desde o goberno local preferiron retrasar a inauguración ata o venres e alongar as primeiras horas dos ciclos de depuración.
“Queremos que os veciños desfruten dunha piscina máis segura, máis moderna e con acceso libre este verán”
Gonzalo Louzao, alcalde da Estrada
“As obras eran necesarias e quixemos que se executaran con garantías. Sabemos que a demora xerou expectativas e por iso queremos compensar esa espera cun xesto que alivie tamén os petos dos veciños”, asegurou Gonzalo Louzao en relación á gratuidade das piscinas. Engadiu que “o Concello fará un esforzo mentres as instalacións van collendo ritmo de normalidade”.
Tamén quixo agradecer “aos veciños a comprensión que nos demostraron”. “Calquera que teña afrontado unha obra, mesmo no plano doméstico, pode comprender o sucedido”, sinalou o mandatario.
Aproveitou a ocasión para afear a “pouca altura” das críticas que fixo o PSOE a través das redes sociais, “agochadas entre as constantes faltas de respecto e de educación”.
As obras retrasáronse debido a que se atopou que o fondo da anterior piscina estaba construído sobre unha lousa de formigón flotante, froito da remodelación na década dos 90, que non quedara ancorada aos muros laterais. Debido a iso, o goberno municipal seguiu o consello dos técnicos e apostou por reducir o tamaño do vaso á metade, podendo ser homologable para a realización de competicións.
Iso último non era unha cuestión menor, pois era unha petición do clube de natación e, no caso de ter reducido lixeiramente o tamaño, non se podería homologar.
Deste xeito, agora conta cun vaso de compensación que vai beneficiar o funcionamento xeral da piscina e, asemade, vaille conferir unha maior seguridade.
De cara ao próximo verán, a previsión do goberno que preside Gonzalo Louzao é instalar unha área de recreo acuático na que os rapaces poidan gozar xogando coa auga. Isto faríase a través de elementos coma chorros ou caldeiros que volteen accionando un mecanismo.
Zona verde
As obras deixaron pegada na zona verde que rodeaba a piscina de maior tamaño. Os técnicos valoraron a opción de colocar herba natural en tepes, pero requeriríanse certos coidados nas xornadas posteriores á súa colocación que non se poderían garantir cun uso intensivo do espazo, polo que se apostou por unha variante sintética para o que resta de tempada. Ao pecharse o recinto ao público, sementaráse herba natural.
Imaxe de portada: a piscina grande enchéndose // Concello da Estrada
Deixar un comentario