O Pazo de Oca, as rutas de sendeirismo e a gastronomía son as actividades máis demandadas polos visitantes que se achegan ata A Estrada, segundo o Concello da Estrada. Os puntos de información turística atópanse na Casa das Letras e no alcumado como o Versailles Galego.
As oficinas de turismo agardan que a afluencia de visitantes se vexa incrementada a partir de agora, coa ponte festiva do 25 de xullo e coa chegada do mes de agosto. Polo momento, o 50% dos visitantes do municipio estaban aloxados nel, en moitos casos en casas de turismo rural.
A maioría dos que visitaron A Estrada proceden de fóra de Galicia, destacando comunidades como Andalucía, Madrid, Cataluña e País Vasco. O rango de idades predominante vai dos 40 aos 75 anos, sendo elevado o número grupos de familiares sen nenos pequenos ou amigos.
En canto ao Pazo de Oca, combínanse os visitantes que queren descubrir o seu interior cos que chegan atraídos pola sona dos seus xardíns. Aínda que a Rapa das Bestas rematou hai unhas semanas, o curro do Campo do Medio, o curro vello e propostas de sendeirismo como a Ruta dos Muíños de Vesacarballa ou a que leva aos petróglifos, converten Sabucedo nun punto de atracción turística.
De feito, moitos visitantes interesados nos atractivos naturais, empregan as oficinas de turismo para informarse de rutas de sendeirismo. Outras das consultas está relacionada coa gastronomía, buscando establecentos onde comer salmón ou polbo á feira.
Estas oficinas tamén foron empregadas por estradenses que buscaban material divulgativo sobre os encantos do municipio para ofrecerllo aos seus clientes e visitas.
As dúas oficinas abren de martes a domingo. De martes a venres fano en horario de 10.30 a 14.00 e de 16.00 a 19.00 horas; os sábados de 10.30 a 14.00 e de 16.00 a 19.30 e os domingos de 10.30 a 13.30 horas.
Imaxe de portada: oficina de turismo // Concello da Estrada
Xornal da Estrada 
Deixar un comentario