“Un importante número de empresarios” participou nunha reunión sobre a ampliación do polígono

O Concello da Estrada acolleu este luns unha reunión sobre a ampliación do polígono de Toedo na que, segundo informou o Concello nunha nota de prensa, participou “un importante número de emepresarios” que teñen interese en asentarse nel. Xunto a eles estiveron representantes da Consellería de Economía e Industria e de Xestur, o alcalde da Estrada, Gonzalo Louzao, e o concelleiro estradense de Promoción Económica, Óscar Durán.

A directora xeral de Estratexia Industrial, Margarita Ardao, informou de que se está empezando a traballar na redacción do proxecto de urbanización e que, de feito, o prinicipal motivo desta reunión era coñecer de primeira man as necesidades das empresas para “poder debullar un parque adaptado ás demandas reais do concello e das empresas”.

Gonzalo Louzao sinalou que a reunión foi “moi produtiva”. “Buscamos que A Estrada incremente moi pronto a súa oferta de solo industrial. Hoxe concretáronse as necesidades de cada unha das empresas e foi un número moi importante delas”, comentou, aínda que non se ofreceron cifras do número de empresas participantes.

Ademais, explicou que os asistentes quedaron emprazados a futuras reunións para traballar en dúas liñas diferentes: “no proceso de expropiación e no proxecto de urbanización adaptado ás demandas de cada unha das empresas”.

Continuou falando da importancia de que se concreten esas necesidades antes do mes de febreiro para, así, “poder saber os metros cadrados e as necesidades específicas de cada unha das actividades”.

A previsión é que no 2026 “se fagan as tramitacións urbanñisticas e de expropiación” e que o 2027 quede reservado á propia obra. Con ela ampliaráse a superficie do complexo nuns 157.000 metros cadrados, ou o que é o mesmo, aumentaráse un 82% a súa área.

Imaxe de portada: Reunión do Concello e da Consellería de Economía e Industria cos empresarios // Concello da Estrada