Prevense acumulados de 80mm en 12 horas
O episodio de chuvias persistentes non cesa. Unha fronte moi activa cruzará este martes Galicia obrigando á activación de avisos por chuvia acumulada nunha e en 12 horas, chegando a laranxa neste último caso.
Dende o mediodía deste luns está activo un aviso amarelo por chuvia acumulada en 12 horas, con cantidades de 40mm nese periodo de tempo. Entre a medianoite e as 4.00 horas deste martes o acumulado previsto aumentará aos 60mm.
Entre as 4.00 e as 16.00 horas ese aviso pasará a ser laranxa, posto que os acumulados poden chegar aos 80mm. Entre as 16.00 e o remate do día voltará a ser amarelo, con acumulacións de 60mm en 12 horas.
Ademais, entre as 4.00 e as 16.00 horas tamén se activará outro aviso amarelo, neste caso por acumulacións de 15mm nunha hora.
Por ese motivo a Comisión Escolar de Alerta acordou a suspensión das actividades escolares no exterior en todo o interior de Pontevedra. Asemade, tamén se suspendeu a actividade deportiva no exterior, tanto XOGADE como federada, entre as 4.00 e as 16.00 horas.
Novos avisos
Este episodio non suporá o final dos avisos meteorolóxicos. Para mércores a AEMET xa activou sendos avisos amarelos por chuvia e vento. Nas 12 horas comprendidas entre as 6.00 e as 18.00 horas poderanse acumular 40mm. Ademais, entre o mediodía e a medianoite poderanse rexistrar refachos de 70km/h.
Imaxe de portada: ballón na Estrada // Xornal da Estrada / Arquivo
Xornal da Estrada 
Deixar un comentario