🌐 Os titulares
🏠 O Concello cede terreos ao IGVS para a construción de vivenda de protección oficial
No pleno deste xoves cedéronse 1500m2 de terreo para a construcción de Vivenda de Protección Oficial na contorna do Mercadona. Neste terreo e nun colindante que xa pertence ao Instituto Galego de Vivenda e Solo poderíanse construir, en total, ata 60 vivendas.
🏠 PP e PSOE rexeitan a moción de Móvete
Propoñía medidas para controlar os prezos da vivenda no concello. Móvete e BNG coincidiron en que non lles sorprendeu a negativa dos populares pero si que lles sorprendeu a dos socialistas.
🏠 Deza e Tabeirós, zonas tensionadas
O BNG asegura que o prezo da vivenda na Estrada, Lalín e Rodeiro aumentou un 44% e eses concellos están considerados zona tensionada. O partido solicitou no Parlamento que se realice un estudo sobre como afecta o incremento, que se constrúa vivenda pública e que se ceda de balde os activos de uso residencial da Sareb.
Segundo o portal Fotocasa, o prezo da vivenda de segunda man na Estrada aumentou un 10,2%.
🚑 O Centro de Saúde contará con servizo de hemodiálese
Formaráse aos pacientes para que, algúns, poidan facela nas súas casas e, o resto, faráo no propio Centro de Saúde baixo a vixilancia de sanitarios. Esta medida tómase despois de que se recolleran máis de 6000 sinaturas pedindo o servizo.
🛣️ O PSOE pídelle ao Ministerio melloras na N-640
O PSOE solicitoulle ao Ministerio que execute melloras en todo o tramo da N-640 que cruza o concello. En concreto, López Bueno pediu unha renovación total do firme, melloras de seguridade no casco urbano, medidas de calmado de tráfico en Liñares e unha nova incorporación no Sol. Ademais, marcouse como obxectivo ter algunha destas melloras ao longo do ano.
🚧 O Concello non pode asumir a reforma da Estación
Así llo confirmou Gonzalo Louzao a Laura Piso, representante dos colectivos xuvenís englobados na Estación. O mandatario asegurou que os fondos non son ilimitados e téñense que destinar a outras materias tamén importantes.
A reforma do espazo, que conta con graves deficiencias estruturais, custaría medio millón de euros. Tamén se descartou a contratación mediante convenio dos monitores.
🍏 O BNG mantivo un encontro co sector da mazá
Coñeceu de primeira man as súas necesidades e as súas expectativas de cara o futuro. Ademais, desde o partido pediron solucións para o Novo Mercado.
🚲 A Estrada acollerá a meta dunha etapa do Gran Camiño
Apunten a data: xoves 27 de febreiro. Ese día a segunda etapa do Gran Camiño rematará na Estrada. A etapa comezará en Marín e contará cun circuíto final polo que se farán varias pasadas. Será o primeiro día no que os favoritos poidan mostrar as súas cartas de cara á xeral.
Máis información
A Estrada acollerá a meta da segunda etapa do Gran Camiño
A etapa contará cun “circuíto chulo” e meta en Calvo Sotelo
📚 Presentada a programación do Ano Cultural Avelina Valladares
Coincidindo co bicentenario do nacemento de Avelina Valladares, escritora de Berres, 2025 será o Ano Cultural Avelina Valladares. Esta será a programación:
8 de marzo | Presentación Os Herdeiros de Vilancosta, Santiago Cortegoso
Abril | Musical de Tequexetéldere e a EMAE baseado no libro de Cortegoso
Abril | Presentación dunha unidade didáctica sobre Avelina Valladares para os centros educativos
Maio | Distribución nas librarías de bolsas con frases da escritora
Xuño | Ruta en Berres liderada por Pilar Bernárdez
Outubro | 5 ponencias sobre a poesía, vida e as vertentes xornalística e musical de Avelina Valladares
Outubro | Exposición itinerante polos centros educativos
Novembro | Entrega Premio Avelina Valladares
Novembro | Presentación dunha recopilación da obra de Valladares
🎞️ Así será o Panic
17 de xaneiro, 20.00h | Charla con Manel Loureiro no Teatro Principal
17 de xaneiro, 22.30h | Maratón de cine de terror: Yummy, Terrifier 3, Black Friday, El exorcista del Papa
24 de xaneiro, 20.00h | Charla con Juan de Castro, director do festival Galician Freaky Film Festival de Vigo, no Teatro Principal
24 de xaneiro, 22.30h | Proxección Heretic
31 de xaneiro, 22.30h | Proxección Strange Darling
1 de febreiro, 19.00h | Charla con tres científicos sobre a morte e as experiencias próximas a ela no Teatro Principal. Intervirán: Luján Comas, anestesióloga e presidenta da Fundación Icloby; María Garrido, osteópata e piscóloga, e Enrique Monzó, enxeñeiro de telecomunicacións e integrante do grupo internacional Oregano.
💸 Lotaría do Neno
4 décimos premiados co segundo premio chegaron á Estrada.
😞 DEP
Lola dos Peares faleceu aos 68 anos de idade por mor dunha caída accidental.
Xornal da Estrada 
Deixar un comentario