Todos podemos salvar vidas

Na Estrada, cada mes uns catro veciños sofren un ataque cardíaco e, se se actúa nos cinco primeiros minutos, as probabilidade de salvar a vida é do 80%.

Por iso, este luns o alcalde, Gonzalo Louzao, o concelleiro de Sanidade, Óscar Rancaño, e Javier García, Manuel Martínez e Eloy Balo en representación da Policía Local, Emerxencias A Estrada e Garda Civil, respectivamente, presentaron ante os representates de diferentes asociacións municipais o programa CardioAngel.

CardioAngel é unha aplicación que se pode descargar no teléfono móbil que permite recibir unha alerta se unha persoa sofre un ataque ao corazón a menos de 400 metros de distancia en liña recta para poder prestarlle os primeiros auxilios en caso de que se poida e que permite alertar en caso de ser un mesmo quen o sofre.

Permitirá “ser un anxo” aos cidadáns, podendo salvarlle a vida a algún veciño. Ademais, é unha aplicación completamente anónima, aínda que hai que concederlle algún permiso para que poida xeolocalizarnos. Cada tres minutos monitorizará a nosa ubicación para, en caso de que alguén necesite ser atendido por unha parada cardiorrespiratoria ou sexamos nós quen o precise, poida enviar a alerta aos terminais que se atopan a menos de cinco minutos a pé coa ubicación exacta da emerxencia.

Cando alguén active a alerta, soará nos teléfonos próximos unha alerta de 15 segundos de duración, que quen a reciba poderá aceptar ou rexeitar. Calcúlase que, para ter ben cuberto o casco urbano, serían necesarios, polo menos, 90 “anxos” e que no rural esa cifra ascendería ata superar os 200.

A Estrada, xunto con Ribeira, é un dos concellos pioneiros en contar con esta rede de voluntariado. Como parte da campaña, este sábado terá lugar no MOME unha formación de Reanimación Cardio Pulmonar (RCP) á que pode asistir quen estea interesado sen necesidade de inscribirse. Será de 10.00 a 14.00h – os horarios serán flexibles – e esta formación iráse ampliando en función da demanda, podendo chegar a levarse ás parroquias.

Imaxe de portada: presentación de CardioAngel // Concello da Estrada