Este é o momento no que un hidroavión estrélase mentras extinguía un incendio en Eubea, Grecia. Os dous ocupantes faleceron no accidente. Este é un dos múltiples incendios que está afectando ao Mediterráneo. No país heleno o máis grave atópase na illa de Rodas onde estáse levando a cabo a maior evacuación da historia do país por culpa dun incendio.
En Italia o peor atópase en Sicilia, coa illa ardendo en múltiples puntos e, en Arxelia, xa se produciron 34 mortes a causa dos lumes.
A situación dos traballadores da hostalería moitas veces non é a mellor, con xornadas abusivas e soldos baixos. A semana pasada viamos o caso dun grupo empresarial no que a muller do xefe trataba mal aos empregados e hoxe imos ver outro caso.
No grupo de Facebook Denuncia explotación laboral A Estrada fixéronse eco de varios testemuños de persoas que traballaron nunha cervexaría da Estrada. No primeiro deles atopámonos cunha extraballadora do local que comenta que “ninguén aguanta alí” e que “levará o cartel máis dun ano pegado fóra buscando xente”. Sobre a xornada laboral, relata, “a cantidade de horas é inhumana, estaba facendo 12/13 horas todos os días, non tiña vida e estaba perxudicando á miña saúde, tanto física como mental”. O relato continúa indicando “que había semanas que non descansaba nin un só día e, sobre todo, estar aguantando o trato, horrible”.
E do soldo, xa mellor nin falar:
“De sueldo ya ni te digo: 800 miserables euros asegurada 4 horas, como yo muchísima más gente ha pasado por ahí y ha estado en la misma situación“.
Extraballadora, vía Denuncias explotación laboral A Estrada.
Outra persoa comentou que traballou uns días de mañá e outros de tarde sen problemas ata que, un día que traballaba pola mañá, díxolle que tiña que ir pola noite xa que había partido. “Avísame pola tarde e díxenlle que non podía” por que “tiña un compromiso familiar”. Tal e como conta, “a súa resposta foi que se non ía ir, que non volvera por alí e que non ía cobrar nada do que traballara”. Conta que “intentei reclamar legalmente e só estivera asegurada dous días, cando xa levaba traballado entre 15 e 20 días”.
No último caso que se fixo público, o dunha excociñeira, coméntase que “fai tempo que denunciei […] porque non me quixo pagar o soldo” e, “despois de ter un contrato fraudulento e idas e vidas, non houbo forma de cobrar”. Tras isto, relata, “enfadeime porque eu cumpría con creces o meu traballo, e tivo a indecencia de dicirme que non volvera”. Tras isto, “leveino a Maxistratura” e tivo que pagarlle o soldo “e saíulle caro”. Por último, culmina cun “eran horas de pararlle os pés a todos estes que non son xefes nin nada”.
Este xoves 27 celebraráse no MOME unha charla informativa sobre o coidado da pel organizada pola Asociación Española Contra o Cancro. A charla dará inicio ás 20.00h e estará impartida por Santi Nodar, farmacéutico de farmacia comunitaria. O acceso é gratuíto.
O domingo 30 e o luns 31 a parroquia lalinense da Xesta festezará as súas festas na honra da Virxe do Carme. O domingo oficiaráse unha misa ás 13.00h e, despois, o grupo Arena amenizará a sesión vermú. Dito grupo estará acompañado na verbena pola orquesta Galilea. O luns a misa oficiaráse ás 12.30h e, despois, haberá sesión vermú a cargo do dúo Dilema. Este grupo estará acompañado na verbena pola orquesta Cinema e o DJ Pacheco.
Berres (A Estrada) festexará as súas festas na honra da Virxe do Amparo e de Santa Lucía do sábado 29 ao luns 31.
O sábado celebraráse, a partir das 18.00h, o Trofeo Virxe do Amparo no Campo O Pardiñeiro. Nel enfrontaránse a ACD Vetereanos de Berres e UllaOil Veteranos. A partir das 22.30h dará inicio a verbena amenizada por Treixadura e Charleston Big Band.
O domingo oficiaráse unha misa solemne ás 12.30h na honra da Virxe do Amparo. O pasarrúas, a sesión vermú e a verbena correrá a cargo de Lume na Lareira, da Banda Municipal de Silleda e da Banda Artística de Merza.
O luns 31 celebraráse unha misa na honra de Santa Lucía ás 13.00h. A Banda Municipal da Estrada dará un concerto e amenizará a sesión vermú. Pola noite, haberá unha verbena a cargo da orquesta Panorama e o DJ Carlos López.
O sábado 29 celebraráse en Agolada a Festa dos Chóferes. A actividade principal levaráse a cabo na Carballeira da Zanquiña. Ás 12.30 oficiaráse unha misa e, media hora despois, dará inicio desfile desde a igrexa. Bico da Balouta porá música no desfile e, despois, na sesión vermú. Pola tarde haberá xogos entre os que atopamos o touro mecánico, carreiras de sacos ou a corda. Pola noite será a verbena a cargo da Charanga Santa Compaña, o DJ Marcos Fdez. e o DJ Pacheco.
A parroquia de Breixa, en Silleda, honrará ao Santiago Apóstolo cunha misa solemne ás 13.30h e unha sesión vermú e verbena a cargo do dúo Punto Zero.
Fafián, en Rodeiro, festexará o Santiago Apóstolo o 25 e 26 de xullo. Ambos días oficiaráse unha misa solemne ás 13.30h. O martes 25 tamén haberá sesión vermú e verbena a cargo do trío Reflejos. O mércores 26 será o turno de Pachi Show e Laura Ocampos.
A parroquia lalinense de Sello festexará o Santiago Apóstolo e Santa Ana con dous días de festa. Os festexos comezarán o martes 25 cunha misa solemne ás 13.00h e co pasarrúas e sisión vermú a cargo da charanga KM0. Pola noite, a verbena correrá a cargo de Xtra e Nueva Era.
O mércores 26 haberá unha misa solemne ás 13.00h e, ao remate desta, unha sesión vermú a cargo da charanga Ardores. Á noite actuará dita charanga acompañada de 3. Com.
Eidán, en Agolada, celebrará as súas festas na honra a Santiago Apóstolo o 25 e 26 de xullo. O martes 25 oficiaráse unha misa solemne ás 13.00h. Haberá un pasarrúas e sesión vermú a cargo da charanga Leña Verde e, pola noite, dita charanga estará acompañada polo dúo Acherizados.
O mércores 26 haberá unha misa solemne ás 13.00h e sesión vermú e verbena a cargo do dúo Élite.
Ao longo da verbena haberá sorteos.
Xornal da Estrada 