O PP foi o partido gañador en case todos os concellos da provincia de Pontevedra. Nas capitais de Deza e Tabeirós-Terra de Montes a participación aumentou e a formación popular foi a gran beneficiada: na Estrada aumentou o seu número de votos en 1500 papeletas e, en Lalín, en 1600.
Na Estrada tamén subiron PSOE (300 votos máis) e BNG (100 votos). Polo contrario, Sumar perdeu preto de 100 votos respecto ao seu predecesor Unidas Podemos e Vox perdeu 350 votos.
En Lalín o BNG conseguiu manterse pero o resto de partidos perderon votantes. Deste xeito, 250 electores menos introduciron a papeleta do PSOE nas urnas da localidade, 150 a de Sumar e 350 a de VOX.
A participación das Eleccións Xerais aumentou en comparación cos últimos comicios deste tipo en España e en Galicia, pero tamén nos concellos de Deza e Tabeirós-Terra de Montes.
O concello que máis destaca é Agolada, cun 49,59%, no que a participación ascende máis de 19 puntos respecto ás de novembro de 2019. Con este ascenso, ás 14 horas sitúase preto dos datos de participación das 18h dos últimos comicios nacionais, nos que a esa hora votaran un 52,72% dos censados.
No resto de Deza, en Lalín ás 14h xa votara un 39,72% dos chamados ás urnas, 8,2 puntos máis que en 2019, en Silleda xa o fixo un 39,35% (+7,23), en Vila de Cruces un 41,13% (+11,89), en Dozón un 31,96% (+6,8) e, en Rodeiro, un 37,5% (+12,01).
En Tabeirós-Terra de Montes foi A Estrada o concello no que máis porcentaxe dos chamados ás urnas votou ata as 14 horas. En concreto votou un 42,5% do censo (+8,42). En Cerdedo-Cotobade fíxoo un 41,99% (+9,03) e, en Forcarei, un 37,33% (+5,78).
Ábrense dous escenarios: ou goberna o PSOE ou repítense eleccións, a non ser que ou PP ou PSOE apoie ao contrario.
00.33 O 23X EN GALICIA
O PP gaña 3 escanos que perde o PSOE, Sumar faise co escano de Unidas Podemos e o BNG mantense. Pontón anunciou que colaboraría nun goberno de coalición de esquerdas.
00.28 172 CONTRA 171: O GOBERNO DE ESPAÑA DEPENDE DE JUNTS
Os resultados dos comicios foron moi axustados: o bloque de coalición suma 172 escanos e, o de dereita, 171. No medio, 6 escanos de Junts que poden levarnos a unha repetición electoral.
00.20 FEIJÓO QUERE CAMBIAR A LEI ELECTORAL PARA EVITAR QUE SE CELEBREN ELECCIÓNS EN XULLO E AGOSTO.
00.17 FEIJÓO PÍDELLE AO PSOE, “O PARTIDO QUE PERDEU AS ELECCIÓNS”, QUE LLE DEIXE GOBERNAR
Baséase en que ata o momento “todos os gañadores das eleccións gobernaron”, pese a que nalgunhas autonomías teñen gobernado candidatos do PP sen ter a victoria.
00.09 COMPARECE ALBERTO NÚÑEZ FEIJÓO (PP)
Destaca que o PP gaña as eleccións por primeira vez en 7 anos e que o bloque de dereita gañou escanos, algo que o de esquerda “non o fixo”. Anuncia que comezará a negociar para intentar gobernar.
00.07 O NÚCLEO DURO DE FEIJÓO SAE A FESTEXAR
Son a forza máis votada.
00.01 CARAS LONGAS ENTRE OS DE ABASCAL
Perderon 19 escanos e non serán decisivos.
23.56 COMPARECE SANTIAGO ABASCAL (VOX)
Ataca aos medios de comunicación por “demonizar” a VOX e a Alberto Núñez Feijóo por confiarse cando as enquisas lle daban unha clara victoria. Destaca que Feijóo non terá que chamar a VOX para gobernar, senón que terá que chamar a Sánchez, “como el quería”.
23.53 OS SEGUIDORES DOS SOCIALISTAS APODÉRANSE DE LEMAS EMPREGADOS DE FORMA NEGATIVA
Berran “sanchismo” para celebrar a victoria.
23.48 COMPARECE PEDRO SÁNCHEZ (PSOE)
Di que o 29 de maio convocou as eleccións porrque os españois tiñan que decidir “que rumbo tomar” e destaca que “o grupo involucionsta que quería derogar todos os avances destes 4 anos fracasaron”.
23.44 COMPARECE YOLANDA DÍAZ (SUMAR)
Resalta que as enquisas daban unha victoria clara do PP, con gran posibilidade de gobernar.
23.39 COMPARECE ARNALDO OTEGI (EH BILDU)
Festexa o ascenso en número de deputados e senadores.
23.29 COMPARECE MÍRIAM NOGUERAS (JUNTS)
Junts é o partido clave para que Sánchez poida gobernar e avisa que o seu apoio terá un prezo.
23.23 AS MINISTRAS SOCIALISTAS BAILAN AO RITMO DE ROSALÍA MENTRAS SE ESTÁ MONTANDO O ESCENARIO EN FERRAZ.
23.20 COMPARECE ANDONI ORTUZAR, PRESIDENTE DO PNV
Di que cumpliron o obxectivo de ter grupo parlamentario propio, o que axudará a defender os seus intereses en Madrid.
23.17 MÚSICA E FESTA EN FERRAZ
23.13 O PP RECLAMARÁ O SEU DEREITO A GOBERNAR POR SER A PRIMEIRA FORZA
23.06 COMPARECE GABRIEL RUFIÁN (ERC)
Refírese á perda de 6 escanos dicindo “que foron as eleccións españolas máis españolas” e que os resultados non eran os agardados. Ademais anunciou que o seu apoio a Sánchez terá un prezo a pagar.
20.09 UN GOBERNO DE DEREITAS, ÚNICA OPCIÓN POSIBLE SEGUNDO O SONDEO DE GAD3
O sondeo de GAD3 mostra como único escenario posible unha coalición PP+VOX para poder gobernar. Xuntos sumarían 181 escanos, superando os 176 necesarios para gobernar.
20.02 O PP GAÑARÍA SEGUNDO A ENQUISA DE SIGMADOS
Alberto Núñez Feijóo sería quen gañaría os comicios con entre 145 e 150 escanos. Só, no mellor dos casos darían gobernado con VOX superando nun dos escanos a maioría absoluta.
20.00 PECHAN OS COLEXIOS ELECTORAIS
18.42
AGOLADA ENCABEZA A PARTICIPACIÓN EN DEZA E TABEIRÓS-TERRA DE MONTES
O concello dezano de Agolada continúa encabezando a participación nas comarcas. O dato ás 18 horas sitúase no 62,68% (+9,96 puntos respecto as últimas eleccións). En Lalín a participación atópase no 56,57% (+2,75), en Silleda no 56,73% (+4,21), en Vila de Cruces no 58,31% (+7,87), en Dozón no 55,43% (+8,66) e, en Rodeiro, no 58,24% (+8,24). En Tabeirós-Terra de Montes quen lidera é Cerdedo-Cotobade cun 60,24% (+3,24), seguido da Estrada cun 57,8% (+3,43) e Forcarei, no que votou un 56,07% dos electores (+2,23).
18.37 A PARTICIPACIÓN EN ESPAÑA SITÚASE NO 53,12%
A participación ás 18h en España finalmente sitúase no 53,12%, 3’73 puntos menos que nas eleccións de 2019. En Galicia douse o caso contrario: a participación ascendeu 2,7 puntos respecto ao 10N ata situarse no 55,96%.
18.04 BAIXA A PARTICIPACIÓN EN ESPAÑA E SUBE EN GALICIA
A participación ás 18 horas en España baixou respecto ás eleccións de 2019. O dato sitúase no 52,01%, 4’84 puntos menos. En Galicia subeu 2,5 puntos ata situarse no 55,91%. Este dato aínda pode variar.
A participación das Eleccións Xerais aumentou en comparación cos últimos comicios deste tipo en España e en Galicia, pero tamén nos concellos de Deza e Tabeirós-Terra…
O xornalista Alfredo López Penide, xornalista da delegación de Pontevedra do xornal La Voz de Galicia, resultou ferido tras o ataque dun mozo na redacción do xornal. O autor, Andrés de Vicente Fuentes, presentouse na redacción e, visiblemente alterado, comezou a berrarlle a unha empregada que el era o mozo que agredira a Mariano Rajoy en 2015 e que ía a queixarse dunha publicación sacada polo xornal na que se informaba dunha nova condena do mozo. Tras isto, sacou un rodete de cociña e un coitelo e comezou a golpear os equipos informáticos da entrada.
A empregada fuxiu para refuxiarse nun supermercado próximo. Isto aproveitouno De Vicente para acceder á redacción, onde se atopaba traballando López Penide. O xornalista foi atacado, recibindo cortes no brazo e nunha man e unha picada no peito. López Penide conseguiu escapar do ataque para refuxiarse no mesmo supermercado que a súa compañeira.
Nese intre chegaron dúas redactoras e, ao ver que o atacante permanecía na redacción, aproveitaron para pechar por fóra para que non puidese saír ata a chegada da policía. Foi necesaria a intervención de seis axentes para que o agresor depuxese a súa actitude. Unha vez detido,foi trasladado á Unidade de Psiquiatría do Complexo Hospitalario de Pontevedra (CHOP).
De Vicente Fuentes, con 17 anos, pegoulle unha puñada na cara ao expresidente do Goberno Mariano Rajoy nun acto de campaña electoral en 2015. No 2019 foi detido por golpear a un dirixente de VOX e, en 2020, volveu a ser detido, esta vez por agredir a un cliente dun bar de Ourense e, ademais, dirixiuse aos presentes coas palabras “ides morrer todos”.
Moitos medios de comunicación mostraron o seu apoio ao compañeiro de La Voz de Galicia agredido, entre os que se atopa o propio xornal.
Desde PHDnoticias temén queremos mostrar o noso apoio ao xornalista.
Correos admitiu máis de 2,6 millóns de solicitudes de voto por correo para estes comicios do 23 de xullo. Estas cifras supoñen un 94,71% máis que nas últimas Eleccións Xerais o 28 de abril de 2019 e un 80,45% respecto ás eleccións do 26 de xuño de 2016 que, ata o momento, marcaban o récord histórico de solicitudes de voto por correo.
Correos repartirá ata o domingo a documentación electoral para que os cidadáns poidan votar ata o xoves 20 de xullo. Se vostede vai realizar un cambio de dirección, pode solicitar a través da web do Censo Electoral a reexpedición da documentación en calquera oficina de Correos a outra dirección ou a outra oficina de Correos.
Se non pode acudir ás oficinas de Correos pode autorizar a outra persoa para que llo entregue ela. Neste caso debe entregar unha autorización (debaixo destas liñas atopará o modelo que ofrece Correos) e unha fotocopia dalgún documento identificativo (DNI, pasaporte, permiso de conducir…) do votante e do que entrega o voto.
Xornal da Estrada 