Pasaron as eleccións autonómicas e municipais e VOX entrou en numerosos gobernos locais apoiando ao PP. Nalgúns casos, membros do partido encárganse da Concellaría de Cultura e están censurando algunhas películas e obras de teatro.
En Santa María de Bezana (Cantabria) quitaron da programación cultural a película infantil Buzzlightyear, o spin off de Toy Story, porque aparecen dúas mulleres besándose. Esta producción de Pixar xa recibira críticas por parte do colectivo ultracatólico CitizenGo, que acusou á produtora de ser “un refén dos activistas LGTB empeñados en corromper” aos nenos “mediante o adoctrinamento homosexual”.
A VOX tampouco lle gustan as obras de Lope de Vega. En Xetafe (Madrid), onde goberna o PSOE, pediu nun pleno a retirada das insinuacións sexuais da obra La villana de Getafe. A alcaldesa respondeu que non entran no contido das obras que programan.
A escritora Virxinia Woolf tampouco se librou. En Vademorillo (Madrid), VOX decidiu retirar da programación a obra Olarlando. A novela na que se basa a obra abarca cinco séculos e segue a un aristócrata que vai cambiando de xénero. Desde o goberno local alegaron motivos económicos e, desde a compañía, informaron que esta obra é máis barata que a media. Ademais de denunciar o “veto ideolóxico”, pediron ao PP- partido que preside a corporación municipal- que dera explicacións sobre este suceso ou retirarían outra obra que van realizar no mesmo municipio.
A lingua tamén se restrinxe. En Xixón (Asturias), VOX anunciou a súa intención de non programar música en asturiano. O manifesto Música n’asturianu SÍ, denuncia que isto é unha vulneración de dereitos gravísima. O músico Rodrigo Cuevas escribiu “Diránche que vives nunha ditadura woke, pero en realidade os ditadores son eles”. Tras a queixa de artistas locais e da Academia da Llingua, a VOX non lle quedou máis remedio que recuar.
Pero non só é VOX. En Briviesca (Burgos), o PP retirou de cartel a obra El mar: visión de unos niños que no lo han visto nunca, inspirada na historia do mestre republicano Antonio Benaiges.
En Mallorca retirouse a obra NUA, radiogradia d’un trastorn dado que, segundo informou a actriz Ann Perelló, o seu contido “non é a liña de espectáculos que programarán cos novos cambios de goberno”. En Mallorca goberna o PP en solitario tras fracasar as negociacións con VOX e, segundo informaron, foi por “falta de presuposto” para atender a todos os compromisos herdados do anterior goberno.
O mundo da cultura responde: “sen cultura non hai democracia”
Diferentes persoeiros do mundo da cultura xa se pronunciaron ao respecto: están publicando en redes sociais unha mensaxe na que se di que os “profesionais do mundo da cultura denunciamos a censura que está atentando contra a liberdade de expresión” e lembran que “sen cultura non hai democracia”.
Xornal da Estrada 