30 anos das Nosas Músicas

Este mércores comezará a que, de non ser pola interrupción pola pandemia da COVID-19, sería a 30ª edición do festival As Nosas Músicas. A música tradicional volverá soar durante dous días en Couso.

Programación do mércores

Este mércores a programación festiva comezará pola tarde. Ás 17.00 horas falaráse dos xogos tradicionais na música e na festa con Anacos Educativos. Ás 18.00 horas abrirá a III Mostra de Artesanía e comezará a música coa Charanga Ultreia e, a partir das 19.30 horas, poderáse gozar do espectáculo de monicreques Cocer e cantar, de Seisdedos.

A ruada comezará ás 21.00 horas e contará coa música de Tequexetéldere, Ultreia, Gaiteiros de Barbude, As Rianxeiras da Covecha e Pantereteiras da Carrabouxa.

Programación do xoves

O xoves ás 12.00 horas abrirá a Mostra de Artesanía e, media hora máis tarde, comezará a mesa redonda A tradición oral musical en Galicia, presenza e vixencia, que presentará Pilar García Rego e na que participarán María VIdal, Uxía da Pontraga, Belén Tajes e Leticia López Rey.

Ás 14.00 horas a música das pandereteiras de Buxán e Benofán e os xigantes e cabezudos de Couso animarán a sesión vermú. Ás 16.30 horas poderáse coñecer os xogos tradicionais na música e na festa con Anacos e, media hora despois, reabrirá a III Mostra de Artesanía. Ás 18.30 horas será o turno dos Monifantes, co espectáculo 10 anos percorrendo camiños. Ás 20.00 horas poderáse gozar da animación de Art-Monium e, un cuarto de hora máis tarde, haberá unha iniciación ao baile con Montse Rivera.

Á noite, a partir das 21.30 horas, Lagharteiras, Silvaredonda, Alvariza e a Banda das Crechas encargaránse da música. Tamén se entregará o Premio ANM 2025 a Mercedes Peón. Para rematar, Art-Monium animará o ambiente a pé de pista e haberá unha foliada libre.

Sen efectivo

A gran novidade desta edición vai ser que se empregará o sistema cashless ou “sen efectivo” que se usa na maioría dos grandes festivais. Con este sistema os asistentes empregarán unhas pulseiras cun chip NFC – o que se emprega para pagar co móbil – nas que levarán os seus cartos.

Estas pulseiras entregaránse, sen saldo, na caseta de troco de moeda do festival e, alí mesmo, poderánse recargar tanto con tarxeta coma con efectivo.