A exposición itinerante A Casa de Galicia. 50 anos da Casa de Rosalía chegará este luns á Praza do Concello da Estrada. Esta exposición, que se poderá ver ata o 30 deste mes, fai un repaso sobre a Casa-Museo da poeta galega.
Esta exposición inaugurouse na Coruña en novembro de 2021 e xa percorreu 20 vilas e cidades galegas, ademais da portuguesa Braga.
Sobre a exposición
Arredor dunha estrutura de aluminio encrucillada, a mostra presentará imaxes de gran formato e breves textos, de xeito que a historia da casa quede artellada en seis capítulos: A Casa e o tren ( os motivos detrás da elección da morada), Rosalía na Casa (a escritora vive alí entre 1882 e 1885), Unha casa santuario (as iniciativas da compra 1900-1940), A causa da Casa (Xosé Mosquera e a compra en 1946), O Padroado da Casa (Galeguistas, progresistas e ‘ben vistos’), A Casa de Galicia (entre 1971 e 1972, coas achegas de miles de galegos e galegas de todo o país e da emigración ábrese a casa).
Sobre a Casa-Museo
A Casa-Museo, abriuse ao público o 15 de xullo de 1971 -en pleno franquismo- grazas á implicación de milleiros de persoas e entidades de todo o país e da emigración. O Patronato Rosalía, creado en 1947, converteuse en refuxio do galeguismo con actos como a Misa de Rosalía en Bonaval, que eran auténticos encontros de afirmación galeguista. Nin sequera o franquismo puido facerlle fronte á vontade popular de recuperar esta Casa.
Daquela participaron centos de persoas anónimas de Galicia, a partir da proposta de José Manuel Rey de Viana, organizáronse colectas en moitas vilas e en case todos os centros galegos na emigración. Uníronse máis de 70 concellos, varios bancos e innumerables asociacións de todo o país.
Imaxe de portada: exposición sobre a Casa-Museo // Arquivo
Deixa unha resposta a Dos avances na ampliación do polígono de Toedo ao debate sobre a situación do rural – Xornal da Estrada Cancelar a resposta