52 persoas buscaron en 2025 o acompañamento do departamento de Sanidade da Estrada para deixar de fumar. Este dato púxoo de relevo o Concello con motivo do Día Mundial sen Tabaco, sinalando o acceso prematuro a este e a aparición de novos métodos para fumar.
O programa de deshabituación tabáquica comezou hai vinte anos e nel faise seguemento a cada caso durante un ano. Os primeiros seis meses céntranse no abandono do hábito e os seis seguintes, na prevención de recaídas. Durante as primeiras semanas as citas son semanais, pasando logo a ser quincenais. Na fase de prevención de recaídas as visitas son mensuais.
A el acoden persoas maiores de idade, situándose a media nos 40 anos. Nos últimos tempos, arredor do 60% dos usuarios son mulleres, fronte ao 40% dos homes.
Os interesados poden solicitar cita por teléfono ou por correo electrónico (no 986 677 702 ou no enderezo sanidadeeturismo@aestrada.gal). Na primeira sesión realizaranse cuestionarios estandariados para avaliae o grao de dependencia do tabaco e a motivación para deixar de fumar. No caso de que se precise combinar o traballo cognitivo-condutual con medicación, os usuarios son derivados ao centro de saúde.
Idade de inicio baixa
Na mesa informativa colocada na mañá deste mércores polo Concello, o centro de saúde e a Asociación Española Contra o Cancro púxose de manifesto que a idade de acceso aos hábitos tabáquicos é temperá, situándose en torno aos 14 anos. Ademais, sinalan que o 41% da poboación manifesta ter fumado nalgún momento.
Dende a OMS tamén fixeron referencia aos menores fumadores. Segundo os seus datos, 40 millóns de adolescentes de entre 14 e 15 anos en todo o mundo consumen tabaco e 15 millóns de adolescentes empregan cigarros electrónicos. Nos países con datos rexistrados, a probabilidade de vapear é, de media, nove veces maior entre os adolescentes ca entre os adultos.
Deixa unha resposta