Na verbena do sábado a Olympus non puido actuar
O segundo curro da Rapa estivo moi marcado polo cambio de horario e pola calor. Se o sábado cando se abrían as portas as ringleiras chegaban á nova área de descanso — onde antes estaban as polbeiras –, na mañá deste domingo a xente foi chegando paseniñamente ata encher o recinto.
Seguindo coas comparacións entre curros, o do sábado viuse beneficiado polo horario de tarde en que a temperatura ía baixando e corría unha brisa que servía de alivio. Sen embargo, este domingo o aire nin se movía nin se agardaba que o fixese e as temperaturas non facían máis ca subir.
Por iso, nalgunhas zonas da grada facíase imposible ver a alguén sen un abano ou, cando menos, rodeado de alguén que tivese un. Ademais, houbo un protagonista que non era un aloitador, era o refrescador. O público demandaba que o refrescara posto que ía calor e estaban ao sol, polo que recibiu varios mangueirazos de auga.
O curro comezou cos aloitadores indo a polo Inglés, un garañón que non puxo fácil o acometido dos humanos. Non foron nin un, nin dous, senón tres os intentos que tiveron que facer para aloitalo.
Alén de varias caídas e golpes varios froito da loita coas bestas, o curro transcorreu sen grandes incidencias. Unha vez rematara o curro, cando as bestas estaban saíndo, foi necesario abrir un corredor na area para facilitar aos sanitarios atender a unha persoa do público que sufrira unha indisposición.
Incidencias na verbena
Amais dos cabalos a Rapa conta con outra protagonista: a música. Ao longo de cada xornada numerosos grupos danse cita en Sabucedo para animar o ambiente.
Para a verbena do sábado o gran aliciente era a orquestra Olympus. Por mor dunha falla eléctrica a agrupación non puido actuar. Dende a organización estiman que había unhas 3.000 persoas na festa.
Por iso, este domingo o presidente da Asociación Rapa das Bestas, Paulo Vicente, quixo pedir públicamente desculpas. Confirmou que o problema eléctrico foi alleo á organización.
Punto final
A Rapa porá o seu broche de ouro este luns co último asalto ás greas do Santo. Coma este domingo, o curro adiantarase unha hora respecto do habitual, comezando ás 11.00 horas. Tras iso, as bestas regresarán ao monte.
Deixa unha resposta