Dende este sábado 25 Xornal da Estrada conta cunha nova imaxe visual. Un momento que chega tras varios meses de traballo, nos que se buscou un deseño limpo, moderno e que tivese á Estrada como protagonista.
A nova identidade gráfica do Xornal da Estrada leva o branco como cor predominante, en substitución do verde escuro que protagonizaba a anterior etapa. Mantéñense o vermello e o verde da bandeira estradense, reservándose o primeiro para a actualidade do día a día e o segundo para formatos máis pausados coma o Xornal Semanal. A paleta cromática compleméntase con outras cores que terán protagonismo en novos formatos e en diferentes elementos gráficos.
Aparece un novo elemento protagonista. Trátase dun triángulo, inspirado na parte superior da bandeira da Estrada. Este aparecerá en numerosos deseños do Xornal da Estrada como elemento protagonista. Todos estes cambios tamén se deixarán notar nos vídeos, onde se estrearán novas intros e paquete gráfico.
En tempos de saturación e de IA apostamos polo minimalismo máis absoluto e pola IH — a Intelixencia Humana, a creatividade –. Quizais iso impida que abordemos todos os temas do día, pero todos os que tratemos serán comunicando como queremos, intentando contalo do mellor xeito posible para a nosa audiencia.
Esta nova imaxe baséase nunha realidade do Xornal da Estrada: leva A Estrada por bandeira. Agora, grazas a este cambio, lévaa aínda máis.
Deixa unha resposta