Luis López Bueno, voceiro do PSOE, valorou como “unha boa nova” a futura instalación dos contedores marrón anunciada polo alcalde, aínda que cre que “resolve o menor dos problemas que ten o servizo de recollida de lixo na Estrada”.
Como polo momento é “un anuncio” e agarda que se faga realidade, “porque levan 5 anos prometendo as mesmas cousas e 14 anos sen mellorar o servizo de recollida de lixo” e citou outros problemas nos que se debería traballar: contedores rotos que non se repuxeron e a necesidade de “ampliar a rede de contedores” no rural, incluíndo plástico, papel e vidro.
Afeou que se perderan axudas para a instalación de illas de compostaxe e que non se aforraran “480.000 euros que se lle pagaron a Sogama” ao “non aplicar as medidas propostas polo PSOE” e asegurou que son os socialistas os que lle están “marcando o rumbo ao goberno”.
“Non sei se Gonzalo Louzao pensa que as eivas da recollida de lixo se resolven poñendo o contenedor marrón, pero dende logo ten moito traballo por diante e aínda non fixo absolutamente nada”
Luis López Bueno, voceiro do PSOE
Considera que a instalación do contedor marrón pode “paliar a suba do canon a 130 euros”, aínda que se debería promocionar o seu uso correcto e propuxo que se leve a cabo unha campaña de reparto de cubos para facilitar a reciclaxe dos cidadáns.
Asegurou que “a suba de 315.000 euros vaise dar no 2025” e que o goberno local estaría preparando unha suba nos recibos do lixo.
Imaxe de portada: Contedores do lixo // O Xornal da Estrada
Deixa unha resposta