Un home faleceu sobre as 19.30 horas deste sábado en Couso tras ser rescatado inconsciente do río, nas proximidades da praia fluvial de Pontevea. Os bañistas conseguiron levalo ata a beira do río, mais as dificultades do terreo impediron que o sacaran da auga. Iso non impediu que tentaran reanimalo. Despois de que o sacaran da auga, os efectivos de emerxencias estiveron 40 minutos practicándolle a RCP, pero non foi posible sacalo da parada cardiorrespiratoria.
O varón, duns 35 anos de idade, atopábase cruzando o Ulla dunha beira á outra xa fóra da contorna da praia cando se atopou indisposto. Foron os seus acompañantes, uns compañeiros de traballo, os que o intentaron sacar da auga. Tanto a vítima coma os acompañantes son brasileiros e residen en Padrón, onde traballan nunha empresa de dito concello.
No operativo participaron efectivos do 061, Garda Civil, Emerxencias da Estrada e Teo e as Policías Locais de ambos concellos. Tamén se chegou a mobilizar un helicóptero por se fose necesario trasladalo ao hospital.
Imaxe de portada: o Ulla dende Pontevea // Xornal da Estrada / Arquivo
Deixa unha resposta