O alcalde da Estrada, Gonzalo Louzao, confirmou este martes que o Concello xa ten listo un novo plan de asfaltados no rural. Haberá outro plan específico para o casco urbano. A noticia fíxoa coincidir co remate do anterior plan de asfaltados, no que se actuou en 75 vías municipais de 33 parroquias.
O investimento da última fase foi de dous millóns de euros, 800.000 euros correspondentes ao último capítulo. Na seguinte fase, o investimento será maior.
O novo plan darase a coñecer nos vindeiros días. Sen embargo, o mandatario avanzou que se seguirá o modelo de actuación por fases polo que se leva apostando. Recoñeceu que son moitas as necesidades dun rural tan extenso como o da Estrada e agradeceu a paciencia e comprensión dos veciños e veciñas que agardan que arranxen as estradas que empregan a diario. “Temos que ir por fases e programando en función das necesidades e prioridades, pero todas chegarán”, sinalou.
En canto ao casco urbano, non avanzou detalles. Sen embargo, foi un dos asuntos que, no seu momento, a oposición máis reclamou. Débese ao deterioro que sufriron as rúas nos últimos tempos, especialmente por culpa dos temporais.
Últimos puntos nos que se actuou
O plan que vén de rematar incluíu traballos en 40 vías de 23 parroquias. Concretamente foron as seguintes:
- Toedo: Toedo, Cerrada das Carballas, O Soutiño, O Soutiño-Igrexa e A Carballa.
- San Pedro de Ancorados: O Foxo e O Foxo-Penalba.
- Callobre: Ponteliñares-Moreira (Devesa) e Ponteliñares.
- Guimarei: A Torrevella.
- Santo André de Vea: Trazaríns-Cardelle e Cardelle.
- San Xiao de Vea: Vilanova.
- San Tomé de Ancorados: Igrexa.
- Aguións: A Raxeira, O Codeso e A Frieira.
- Vinseiro: Vis de Correa.
- Matalobos: Guendos e Saiñas.
- Remesar: Aldea Grande e A Rabeta.
- Santeles: Viasque, Sar e Fondevila.
- Berres: Altiño de Berres.
- Orazo: Riomao-Vendexa e Vendexa.
- Arnois: Gundián.
- Loimil: Loimil (Igrexa).
- Rubín: Bemposta.
- Cora: Cora.
- Lagartóns: Os Tatos e O Viso.
- Codeseda: Barro e Vilaboa.
- Nigoi: O Pazo.
- San Miguel de Castro: Igrexa.
- San Miguel de Barcala: Negreira e Cimadevila.
Imaxe de portada: estrada en mal estado en Ribela // Xornal da Estrada / Arquivo
Deixa unha resposta